بحث هذه المدونة الإلكترونية

السبت، 21 ديسمبر 2013

اهم نصايح للمتجر الالكتروني

http://aff.ematajer.com/114.html

اهم نصايح للمتجر الالكتروني


التجاره الاكترونيه بدأت تنتشر شويه في مصر و الشرق الاوسط، لكن برضه مبدأتش تاخد نفس الصوره اللي موجوده في دول تانيه، زي امريكا مثلا اللي فيها اكتر من 40% من الناس اللي بتشتري حاجات علي الانترنت في العالم!

علشان كده قبل ما ابدأ اتكلم بالتفصيل و التسلسل عن خطوات عمل المتجر الالكتروني، انا عايز اقول نصايح بسيطه للي عايز يبدأ يعمل متجر الكتروني:
الزبون هو المطلوب!
1 اعرف زبونك!
لو انت هتعمل متجر الكتروني فكر كويس جدا في الجمهور اللي هيشتري و هيدخل موقعك، ايه نوع الناس اللي هتدخل؟ المنتجات اللي انت بتبيعها هيشتريها مصريين وللا اجانب؟ و لو اجانب هيكونو من الشرق الاوسط وللا هيكونو من دول بعيده؟
الاسئله دي لازم تجاوب عليها بتأني و تفكر كتير، علشان ده اللي هيحدد نوع الموقع اللي انت محتاجه. و طبعا ده هيأثر جدا علي تصميم الموقع و علي لغته! مثلا المصريين و الشرق اوسطيين عموما واضح انهم معجبين جدا بالتكنولوجيا الحديثه، و بيحترمو جدا التقنيات العاليه، علي الاقل ظاهريا! و ده معناه انك لو هتبيع لمصريين او لشرق اوسطيين لازم يكون موقعك مصمم بطريقه احترافيه، يعني تستخدم فلاش، تستخدم خطوط جديده، و طبعا تحط صور كتير… المهم تهتم بالمظهر الحديث و التصاميم المودرن.
علي العكس لو الجمهور بتاعك هيكون من امريكا او كندا استراليا او بعض دول غرب اسيا “الاتحاد الاوروبي” الخ… وقتها هتركز اكثر علي ان يكون الموقع واضح و يكون فيه شرح كافي عن طبيعه المنتجات، حجمها، وزنها.. الخ… خصوصا ان الدول دي هتوصل لها المنتجات عن طريق شركات شحن دوليه، لازم توضح بالظبط نوع الشحن و هياخد وقت قد ايه… خصوصا لو عندك عملاء من الدول اللي بتتكلم الماني (النمسا، لاخنشتاين، اجزاء من سويسرا، لكسمبورج… و طبعا المانيا) يبقي توقع كل انواع الاسئله منهم علي كل نقطه في المنتج و الشحن و السعر قبل ما يشترو، فالافضل انك لو هتخدم الشريحه دي من الناس تهتم جدا بالتفاصيل الدقيقه عن المنتجات و الموقع… طبعا انت مش عايز حد يرجع لك الطرد من المانيا علشان المنتج كان اصغر 1 سم من الحجم اللي مكتوب علي الموقع… فأفضل اكتب بالتفصيل الممل عن المنتج!
2 بتعرف انجليزي؟ اكتب بيه!
زي ما قلت ان اكتر من 40% من المبيعات علي الانترنت بتكون في امريكا! و ده معناه انك لو عملت موقعك بالانجليزي هتضمن جمهور كبير جدا واثق في التجاره الالكترونيه ثقه شبه عمياء. الكتابه بالانجليزي كمان هتجذب لك الطبقات الغنيه في مصر و الشرق الاوسط، و علي كل حال الطبقات دي هي اللي بتشتري من علي الانترنت! لكن بالمناسبه لو الانجليزي بتاعك مش كويس قوي، الافضل انك تستعين بحد يكون بيعرف كويس انجليزي، علشان لو فيه غلطات املائيه او نحويه، الناس هتبدأ تشك في انك مش بروفيشنال!
و طبعا الافضل انك تعمل الموقع بأكثر من لغه، و بالمناسبه فيه برنامج اسمه او اس كومرسبيعمل لك المحل بتاعك مجانا و  بيكون متاح باكثر من لغه، و مش متترجم اوتوماتيك زي ترجمه جوجل اللي مش بتتفهم، لكن متترجم عن طريق ناس من الدول اللي بتتكلم اللغات دي! يعني هيكون مفهوم و سلس و مفيهوش غلطه! لكن طبعا انت لازم تدخل معلومات عن المنتجات باللغات دي، و هو مش هيترجمها لوحده، يعني انت هتحتاج حد يترجمهالك، في كل الاحوال انا باكتب عن البرنامج ده بالتفصيل في صفحه الاو اس كوميرس
100 مليون شخص بيستخدم الباي بال علي الانترنت!
3 اقبل الباي بال! Pay Pal!علي الرغم من ان خدمه استقبال الفلوس علي الباي بال مش شغال في معظم الدول الشرق الاوسط، باستثناء اسرائيل و الامارات، اللا انه من اهم وسائل الدفع في العالم كله! كل الناس في العالم بتشتري بالباي بال علشان هم حاسين ان فلوسهم في امان، انا هاشرح مره تانيه بالتفصيل طريقه تشغيل الباي بال، فيه طرق تانيه تخليك تقبل الباي بال بطريقه قانونيه علي الموقع بتاعك حتي لو انت في مصر او في دوله الباي بال مش بيدعمها، و برضه انا هاشرحها بعدين… لكن مبدئيا لازم نعرف ان الباي بال هو اهم وسيله للدفع علي الانترنت. تقريرالسنه اللي فاتت قال ان فيه 100 مليون شخص علي الانترنت عنده باي بال! رقم اكبر من عدد سكان مصر!
4 بالنسبه لاسم المتجر
نفترض ان عندك محل ملابس فيي وسط البلد مشهور اسمه نفرتيتي، و المحل بيحقق ارباح كويسه و الناس بتثق في منتجاته. يبقي اهم حاجه لما تحب انك تحول المحل بتاعك لمحل اونلاين (متجر الكتروني)  انك تسميه نفس الاسم! طبعا هتلاقي ان Nefertiti.com مش متاح! لأن اكيد حد اخده قبلك، وقتها حاول تستغل كلمه ملابس او موضه في الاسم! مثلا سميه  NefertitiFashion.com او NefertitiWear.com لأن الكلمات بتاعه الموضع و الملابس هتساعد في انك تظهر افضل علي الياهو!
لو معندكش اصلا محل يبقي انت هتختار اسم جديد لموقعك، حاول تعمل الاسم مناسب جدا جدا لمجال المحل بتاعك! مثلا لو انت عايز تبيع احذيه علي الانترنت، يبقي سمي الموقع بتاعك مثلا Shoe.com – shoes.com -shoefashion.com الخ الخ… ووقتها حاول انك تستغل الكلمات اللي الناس بتعمل عليها بحث اكتر… هاشرح مره تانيه ازاي بالظبط تعرف الكلمات اللي الناس بتعمل عليها بحث كتير علي الانترنت.
العالم فيه اكتر من برنامج مجاني يساعدك علي النجاح في المتجر الالكتروني
5 اختار البرنامج الصح!
انا اتكلمت بايجاز عن الاو اس كومرس، طبعا هاكتب عليه اكتر و اكتر. لكن في الحقيقه الاو اس كوميرس هو مش البرنامج الوحيد علي الانترنت اللي بيعمل موقع متجر الكتروني! فيه بدائل كتير ليه! و في كل الاحوال هيختلف اختيارك للموقع باختلاف لغتك و طبعا لغه جمهورك، و في نفس الوقت هتختلف باختلاف خبرتك ، او بمعني اصح قدرتك علي الاستيعاب و الصبر…
6 قلد المتاجر الناجحه في النظام!
معظم اللي هيشترو منك علي الانترنت هيكونو معندهمش خبره كبيره في التقنيات و الكمبيوتر، لكن هيكون عندهم خبره كبيره في التسوق علي الانترنت! يعني متعودين علي المتاجر الالكترونيه و اسلوب عملها، و ده معناه انك لازم تدخل علي متاجر الكترونيه مشابهه الاول و تشوف طريقه البيع و تشوف التصميم بتاعها، و تحاول انك تكون مش مختلف قوي عن الطريقه بتاعتهم، علشان الزباين بتوعك ميتلخبطوش و يعرفو يلاقو المنتجات علي موقعك بسهوله.
7 متقلدش المتاجر الناجحه في الخدمه!
علي الرغم انك المفروض تقلد المتاجر الناجحه في اسلوب عملها و سهولة استخدامها، اللا انك لازم تكون متميز عن المتاجر التانيه في انك تقدم منتجات جديده او مختلفه عنهم. مجرد انك تحط نفس المنتجات بجوده اعلي مش هيفيدك، لأن غالبا الجوده صعب اختبارها علي الانترنت، يعني الناس هتشوف بس الصور و الشرح بتاع المنتجات، ووقتها لو انت بتقدم نفس منتجات و خدمات المواقع الناجحه، الناس هتروح تشتري من لمواقع الناجحه لأنهم هيثقو فيها اكتر!
8 ابعت للزباين اللي اشترو حاجات رسائل كل فتره و اعلن لهم عن منتجات جديده من نفس النوع اللي اشترو منه! Mailing list!
مثلا لو انت عندك مثلا محل فيه احذيه كابات  (قبعه Cap) و فيه حد بعت لك اوردر طالب كاب ، و اشتري الكاب و خلاص… بعد شهر مثلا لو انت عندك كابات جديده، ابعت له صور منها و اسعارها و اكتب له بصفه شخصيه و استخدم اسمه علي الايميل. متبعتش رساله تقول فيها “عزيزي المشتري” لا ابعت له بالاسم “عزيزي احمد، عزيزي مارك” الخ، لأن لما بتبعت للعملاء بصيغه عامه بيحسو انك بتبعت لهم رسايل بتضايق Scam  و ممكن يندمو علي انهم عطو لك الايميل، او حتي انهم اشترو من المحل بتاعك! لكن لما تبعت لهم بصفحه شخصيه ده هيخليهم يحسو انك بتهتم بيهم و بازواقهم، خصوصا لما تبعت لهم من نفس نوعيه الحاجات اللي هم اشتروها! يعني في المثال الاولاني اللي قلت لك فيه ان عندك محل بيبيع كابات و احذيه، لما حد يشتري كاب ابعت له بعد فتره اعلانات كابات، مش اعلانات احذيه (طبعا ممكن تحط في نفس الايميل اعلان صغير تفكره ان عندك احذيه في المحل) لأن 90% من الناس اللي بتشتري علي الانترنت بيشترو منتجان هم مجنونين بيها! يعني اللي يشتري كاب علي الانترنت تعرف انه بيحب جدا جدا الكابات ، و هو اشتري الكاب ده لأنه مختلف عن كل الكابات اللي بيشوفها في الشارع!
9 اكتب اراء الزباين علي المنتجات!
اهم حاجه هتزود الترافيك (الزوار) لمتجرك هي الكتابه الكتير علي المنتج!  ليه متستفادش من الزبون و تخليه يكتب رأيه في المنتج بحريه علي موقعك؟ بعد اربع او خمس ايام من وصول الشحنه للزبون ، ابعت له ايميل او اتصل بيه و اطلب منه انه يكتب لك رأيه بالتفصيل عن المنتج و يبعته لك علي الايميل! وقتها خد الكلام بتاعه و نزله في صفحه المنتج علي الموقع!
10 راقب المبيعات كويس جدا!
اهم حاجه لما تخلص بناء المتجر، هي انك تشوف ايه اللي بيتباع و ايه مش بيتباع! الاحصائيات بتقول ان 90% من المنتجات اللي مش بتتباع خالص هي منتجات ملهاش علاقه بمجال الموقع!
يعني لما مثلا يكون عندك موقع عن اللابتوب و الموبايل وقررت انك تعمل قسم للملابس… هتلاقي ان 90% من المنتجات اللي مش بتتباع خالص هي ملابس! وقتها اللي انت تتعلمه من الدرس ده، هو ان الملابس مش مجالك! كل ما تلاقي ان فيه منتج مش بيتباع خالص خالص بعد سنه و سنتين من بناء المتجر، اعرف ان المنتج ده ملهوشع علاقه بالمتجر بتاعك اصلا! و افضل انك تشيله و تركز علي نوعيه المنتجات اللي بتتباع! و ده هيوصلنا للنصيحه رقم 11
11 خلي عندك مجال!
حدد مجالك و سياستك من البدايه!

مايكل شاف الاي فون مع واحد صاحبه و عجبه! عايز يشتري اي فون برضه! هيعمل ايه؟ هيفتح الكمبيوتر بتاعه و يكتب
http://www.ebay.com ليه؟ علشان الاي باي ده هو اكبر موقع تسوق في العالم كله! اي حد عايز يشتري اي حاجه هيدخل علي الاي باي و يشتريه! الاي باي فيه كل حاجه من الابره للصاروخ زي ما بنقول في مصر… تخيل لو انت فتحت محل بيبيه برضه كل حاجه من الابره للصاروخ… هتنجح ازاي قدام الاي باي؟ اعتقد ان نسبه نجاحك تقترب من الصفر…
لكن قارن المثال ده بالمثال التاني:
مايكل شاف في التليفزيون برنامج عن الملابس الهنديه. شاف واحده لابسه ساري (هدوم هنديه) و عجبه قوي الساري ده و علشان مامته بتحب الحاجات الغريبه، فكر انه يشتري ليها واحد! مايكل هيعمل ايه المره دي؟؟ هيدخل علي الاي باي؟ مش هيلاقي ساري، و لو لقي هيلاقي واحد او اتنين بالكتير… اللي هيعمله انه هيدخل علي جوجل و يكتب (متجر ساري) او (متجر ملابس هنديه) وقتها اتحداك انه يلاقي الاي باي في الصفحه الاولي! هيلاقي كل المحلات اللي متخصصه في الساري و في الملابس الهنديه بس! و دي هي فرصتك!
اعمل محل يكون متخصص في نوع معين من المنتجات، بحيث ان يكون الاقبال عليك من الناس اللي فعلا مهتميه بالنوع ده من المنتجات، و ده معناه طبعا ان الزوار بتوعك و الزباين هيكونو زوار و زباين دائمين!!! ايه احسن من كده؟
12 اعمل منتدي جوا المتجر!
المنتدي من اهم طرق التواصل مع الزبون القديم، و جذب زباين جداد!

الزبون اللي هيدخل اول مره علي متجرك احتمال يكون قلقان من انه يدفع لك فلوس و انت تكون بتنصب عليه! و اسوأ بيكون خالص اللا تكون انت عامل الموقع كله علشان تسرق ارقام الكريديت كارد (بطاقات الائتمان) بتاعة الزوار! و اكبر دليل علي انه يحس انك عندك سمعه و بقالك فتره طويله في المجال هو انه يشوف ان فيه ناس كتير بتتناقش علي موقعك مناقشات ليها علاقه بمجالك! ده هيخليه يحس انه فعلا في امان هو و حساب بنكه! لكن بالمناسبه، متفتحش ابدا المنتدي غير لما يكون عندك ترافيك (زوار) كفايه (مثلا 500 في اليوم او اكتر) لأن وقتها ممكن ده يأثر علي المتجر سلبا! هتلاقي ناس ممكن تدخل علي المنتدي و لما يلاقوه فاضي يقولو ان المتجر مهجور و مش مضمون! لكن لو عندك زوار كتير، يبقي فوايد المنتدي هتبهرك بجد، و انا مش هاقدر اقول كل فوايد المنتدي لأنها بجد اكتر من انها تتعد، لكن انا هاكتب شويه منها:
1 ترتيبك علي الجوجل هيبقي اعلي! كل ما حد يكتب حاجه في المنتدي! (طبعا انت هتعمل المنتدي عن نفس مجال المتجر) ووقتها طبعا زوارك هيزيدو، مبيعاتك هتزيد، و ارباحك هتزيد!
2 الزبون اللي مش متاكد اذا كان عايز يشتري منتج معين او لأ، هيدخل و يبدأ يسأل علي اراء الناس التانيه في المنتج و يسأل اذا كان المنتج فعلا جاب نتيجه او كان مفيد او لأ… ووقتها احتمال اكبر انه يشتري لما يلاقي ردود مفيده علي المنتدي بتاع متجرك!
3 الزباين اللي اشترت منتج و عندها مشكله فيه (مش عارفين يستعملوه ازاي مثلا) هيدخلو علي المنتدي و يبدأوا يكتبو اسئله عن المنتجات و طريقه استعمالها و فوايدها… و ده طبعا هيشيل منك عبء الرد علي كل زبون، لأن هتلاقي ان باقي الزباين بدأت تجاوب! لو مفيش منتدي الزبون هيتصل بيك و يسألك لو انت معطتلوش رد مفيد و مقنع، هتلاقيه تاني يوم باعت لك المنتج و عايز فلوسه (نقطه 14)
4 المنتدي يعني فلوس اكتر و اكتر! تخيل لما تحط اعلانات الجوجل ادسنس علي المنتدي، و تبدأ تجمع فلوس كل شهر منه لمجرد ان زباينك بيكتبو و بيردو علي بعض!!! لكن انا مش عايزك تلخبط بين النقطه دي و بين النصيحه رقم 13…
13 بلاش اعلانات علي المتجر خااااااالص!
علي الرغم من ان الجوجل ادسنس هو اداه جميله للربح، اللا انه مش افضل حل للمتاجر الالكترونيه

ده ممكن يلخبطك و تسألني “مش انت لسه بتقول هنحط اعلانات علي المنتدي بتاع المتجر؟”
ايوه احنا هنحط اعلانات علي المنتدي، لأن الهدف منه بالنسبه للزوار هو هدف حواري، يعني هم بيدخلو المنتدي علشان يسألو بعض اسئله و يجاوبو بعض عليها! يعني لو لقو اعلان هيبقي عادي ممكن يضغطو عليه و يرجعو تاني للمنتدي لأنهم اعضاء!
لكن لو حد جديد دخل المتجر بتاعك و لسه مستكشفهوش، و لقي فيه اعلان بيتكلم علي عرض افضل من العروض اللي انت مقدمها في المتجر، هيعمل ايه؟ طبعا هيقول باي باي لمتجرك و هيروح للمتجر اللي عليه الاعلان! وقتها فكر في اللي انت عملته، انت بعت الزبون اللي كان ممكن يكسبك علي الاقل 10 دولار، انت بعته مقابل 2 سنت لجوجل، او بمعني اصح لمتجر منافس!
14 اعمل سياسه ترجيع واضحه و اتجنب النزاع مع الزبون!
السياسه الواضحه في حاله ترجيع المنتج اهم حاجه علشان الزبون ميطيرش!

هتلاقي احيانا ناس مش هيعجبها المنتج، هيقولو لك انه كان غير اللي اتخيلوه لما شافو صورته و قرو المعلومات بتاعته علي موقعك… هتعمل ايه مع الناس دي؟ لازم يكون فيه شروط معينه توضح العلاقه بينك و بينهم وقتها، مثلا ممكن تقول ان المنتجات لازم ترجع في خلال 4 ايام من تاريخ الاستلام ، اكتر او اقل طبعا كل ما هيكون اكتر كل ما الناس هتتطمن اكتر! لكن المهم انك تكتب شروط واضحه و محدده، لأن زي ما قلت من شويه هتلاقي ان ناس بتسألك اسئله غريبه و ممكن ميشتروش لو لقو ان مفيش عندك سياسه ترجيع البضاعه!
15 ابدأ التسويق و انهي اليأس!
مفيش مجال فاشل علي الانترنت! لو انت بتبيع قنابل هتلاقي ليها زبون! مستحيل ان اي نوع من المنتجات يفشل علي الانترنت! فكر في الموضوع ده، الانترنت فيه مليارات من الناس من كل انحاء العالم بيدخلو كل يوم عليه! يعني افكار مختلفه، الوان مختلفه، اجناس مختلفه، الخ الخ الخ، و كمان استعمل اللوغارتم!  شوف كام واحد هيكون مسيحي ابيض علي الانترنت، او مسلم هندي، او هندوسي امريكي، او بهائي استرالي الخ الخ الخ، كل انواع البشر موجوده علي الانترنت! مستحيل انك تعرض منتج و ميكونش ليه زبون!
طبعا السؤال اللي بيطرح نفسه هو، ليه فيه مواقع كتير بتقفل و تفشل؟ الاجابه ببساطه (في حاله ان الموقع فعلا كويس و معمول بضمير) هو ان صاحب الموقع فشل في تسويقه! لكن الموقع نفسه او المجال نفسه مفشلش! بدليل وجود خمسين منافس ليه و ناجحين! و حتي لو مفيش منافسين ليه، يبقي صاحب الموقع فعلا غبي انه مستغلش النقطه دي و سوق موقعه بطريقه كويسه!
خطواه واحده بتفصل بين موقعك و بين النجاح، و هي الزوار! لازم زوار كتير يدخلو علي موقعك و يكونو مهتمين بالمجال بتاعك! اضغط هنا علشان تشوف نصايح لزياده الزوار لموقعك او متجرك الاكتروني!
فكر في طرق تجيب لك زوار اكتر، شوف مين مهتم بمجالك و اوصل له… ثق في نفسك و اوعي تيأس او تقف… انا المتجر بتاعي بدأ يشتغل بعد سنتين من الاصرار و العناد… و دلوقتي انا مبسوط جدا اني عمري ما يأست، كان هيفوتني كتير.
ادم…

ليست هناك تعليقات: